Uzze nuije hoeglustighei 2012 Prins Paul 3e

Maage veer uuch veurstelle aon de nuije Hoeglöstigheid vaan de Braniemeekers dee euver ’t riek vaan Lummel en Nazareth zal goon regere oonder de naom:

Prins Paul 3e
   Chauffeuricus,Motorfanaticus,kampeericus
In de Börgelikkestand vaan Mestreech steit Heer ingesjreve es
Petrus, Paulus, Hubertina Dessart

Zien ierste leevesleech zaog Heer in Nazareth op ’t Miradorplein boe ouch zien Prinselikke weeg stoond. Es einigste zoon vaan Henk Dessart en Rien Verschuren had Heer had unne Prinselikke jäög in Nazareth. Op viefjaorige leeftied verhuisde Heer naor de Rimburglaon. Daor lierde Heer op straot es batteraof zien ierste streekskes met zien vrundjes.  ’T pleinsje met zien vrundjes zouw Heer neet gemis welle höbbe. Zien ierste lessen kreeg Heer op de kaksjaol in Nazareth in de Rivierenstraot. Later kaom de Basissjaol Sint Franciscus op ziene weeg, boe Heer beij de versjellende juf’s en meisters  (oonder aandere beij juffrouw Rita Bartels en meister Nellisen) zien kinnes verruimde. Nao de basissjaol ging Heer naor de de LTS in Cadier en Kier boe Heer al gauw de metaolbe-werrekings kant op ging. Want sleutelen is ziene passie. In zien puberjaore klomelde heer dageliks ’t aon brommers en later aon moters. Heer heet op sportief vlak ouch ’n poging gewaag ’n belke te trappe beij WVV’28. De euver-gebleve energie probeerde Heer kwiet te raken op de tatami beij judoclub JCKR. In 1988 repe de Piotte häöm oonder de gelederen. Heer woord, sjus wie miejer aajd Preense, gelegerd in Seedorf, Duitsland. Daor woord Heer ingedeild beij ‘t verkinningsbataljon Bravo 103. Daor kaom ouch zien twiede passie um d’n hook kieke: Chauffere. In 1989 bekroende Heer die opleiding met ’t behole van zien groet rijbewies. Toen Heer oonder Deens oet kaom maak de Heer vaan ziene passie zien beroop. Heer woord chauffeur op de vrachwagel wat heer tot op de daag vaan vendaog nog altied deit beij Gorissen Grondverzet es kraonwagelchauffeur.

Met de leefde ging ‘t ouch good. Heer lierde Esther kinne beij de Braniemeekers boe zie op dat moment Hofdame waor. Ut ies waor gauw gesmolte tösse hun twie, getuige hun houwelik 11-11-2005. Nao tot zie eve in Lummel hun leefdesneske hadde gebouwd zien zie in Nazareth goon woene, Kestiel Hartelsteinstraot 32. Daor krege zie al gauw gezinsoet-breijing. Heer heet veer keender: Ricardo, Timethy, Brandon en Nick. Daorbeij höbbe ze get hoesbieste wie vessen (es ze neet weure opgevrete door de haai) en de chinchilla Truijke. Zien hobbies zien: sjeete beij sjeetvereiniging Bronsdal Zuid-Limburg, surfen op de kompjoeter, hiel hel muziek dreije vaan Limburgsen Hollandse en motor reije. Netuurlijk zien d’r ouch nog de Braniemeekers, boe Heer noe 10 jaor lid vaan is en in diverse commissies zit. Ein daorvaan is de Mestreechteraovend commissie. Alles wat oet Mestreech kump (tegelkes, teleure, beeldjes en sjèlderijkes) verzamelt Heer.  Daor struip Heer meinig braderie en rommelmerret veur aof. Daorum luikes, geneerd uuch neet: höb geer get wat betrekking heet op  Mestreech daan kint geer dat beij häöm kwiet. Ouch geit Heer gere met de sleurhut op vakantie en helt Heer vaan lekker eten wie unne echte gastrenoom. Zien groetste passie zien echter zien keender en vruike boe Heer gere met rölselt. Op ziene tied drink heer ouch gere ’n JUPIELKE en JäGERMEISTERKE. Geer zeet uzze Hoeglöstigheid is vaan alle geneugde vaan ut leeve thoes.
Noets verwach en meh stellekes gehoop, uzze nuije Hoeglöstigheid vaan 2012.

Gegeven  22 jannewarie 2012, door de kanselereijraod

Maage veer uuch veurstelle aon de nuie Hoeglostigheid vaan de Braniemeekers dee euver
Proklamatie 2012
Statiefoto vaan Prins Paul 3e