Recent logo BraniemeekersGooje aovend bèste leie vaan Cv de Braniemeekers, 

Naomes de Kanselereijraod wèlle veer uuch gere inliechte. 

Gistere, zoondag 17 jannewarie um 20:11 oor, had 't benkelek momint mote zien boe op veer euze nuie Hoeglöstegheid 2021 hadde wèlle oetrope. Veer kinne väöl wèlle meh, helaas wete veer oondertösse allemaol dat 't corona-virus d'r veur gezörg heet tot neet alles kin. Zoe wie 't Mestreechs gezègkde zeet: 'Alles is meugelek. meh neet 'ne naakse in z'n brook sjiete'. Mèt aander wäörd; wie gere tot veer ouch zouwe wèlle, 't geit gewoen neet. 


Zoe höbbe veer zoe good es alle activiteite aofgebloze, zoe ouch de huldeging vaan eus zjubilarisse en dat vinde veer erg spieteg. Hans Volders (44 jaor), Theo Schefman (22 jaor), Gerda Laurensse (22 jaor), Francien Boumans (22 jaor) kinne veer noe neet in 't zönneke zètte op de gebrukeleke zoondag veur de vastelaovend. Zie zien hij euver ingeliech en veer hope dat later in 't jaor in te kinne hole es veer daan wel weer same mage koume. Vaanaof dees plaots in eder geval al vaan harte perficia mèt eur zjubilei. 

'T Prizzidium heet in de lèste maonde zeker neet stèl gezete en heet same mèt alle aander vereineginge oet de wieke van Mestreech gekeke wat d'r wel meugelek zouw zien. Al gaw koume zie same tot de conclusie tot de vastelaovend 2021 veural in 't teike zal koume te stoon vaan sjariteit. 't vastelaovendsblood zal ouch dit jaor door eus aojers struime en veer es Braniemeekers zalle de 'Mestreechter vastelaovend' zeker neet de rögk touw kiere. Veer blieve de traditie oetdrage in eus wieke en dit jaor in aongepasde vörm boe veer us veurnaomelek goon riechte op dee sjariteit. Vastelaovend steit bekint es 't fies vaan de lach en de traon. Zjus in dizze tied vaan elend beseffe veer us dat aondach veur lui oonderein 'n groet good is. Veer wèlle de lui die 't verdeend höbbe 'n veer in de vot steke en die 't nudeg höbbe 'n hart oonder de reem. 

Zoe hadde veer ouch de discussie of d'r in 't corona-jaor wel of gein medaalje zouw mote koume. Veer zien vaan meining tot veer ouch in 't 50e levesjaor vaan eus vereineging 'n medaalje mote oetbringe en oetgeve. 't kin toch neet zoe zien tot dee geweldege serie vaan 49 prachtege medaaljes oonderbroke weurt door 'n jaor vaan crisis. Veer höbbe Hans Volders gevraog of heer weer get sjoens wouw goon bedinke. Hans gaof aon tot 't oontwerp vaan de medaalje al klaor waor en die mós heer noe in d'n drekbak goeje want 't moot 'n creatie weure in 't teike vaan de crisis. 'n paar daog later koum 't beriech vaan Hans tot de medaalje veerdeg waor en heer nao de leveranceer góng.

Medaalje Haw Pin

D'n habsjaar keek nog ins bedinkelek meh ouch heer gaof greun leech deveur. Veer zien daan ouch bezunder gruuts drop tot veer uuch eus nui medaalje kinne prizzentere en die goon veer uuch ouch allemaol laote touw koume. Veer zien Hans weer biezunder väöl daank versjöldeg veur dees prachtege sjoen medaalje. Chappeau!!!

Normaal reike veer de medaalje oet op d'n aovend vaan 't oetrope vaan de nuie Prins. Veer es Kanselerijraod kinne uuch vertèlle tot veer uuch de medaalje persoenlek koume oetreike bij uuch aon de väördeur.

Mörge, dinsdag 19 jannewarie, vertrèkke veer en koume veer bij uuch langs. Veer zalle zoe good meugelek de veurgesjreve aofstand hawwe en de medaalje zeker neet opspange, meh gewoen aofgeve. Es veer 't neet redde um dinsdag ederein te bezeuke, daan goon veer vriedag 22 jannewarie weijer. 

Oondaanks alles winse veer uuch 't allebèste, blief gezoond en Haw Pin !!!

 

Prinsegallerij





Ga naar boven