Mèt hiel väöl spiet in us hart make veer bekint tot us zier gewaardeerd lid, Theo Schefman, aofgeloupe maondag 8 jannewarie, nao ’nen hiele korte tied vaan kraank zien, op 69 jaorege leeftied en väölste vreug is euverleie.
Theo is in 2000 lid gewore vaan us vereineging en in 2002 woort heer nao “ ’n ope sollicitatie” oetgroepe es Prins Theo 1e. Daonao höbbe veer häöm liere kinne es ‘ne zier aimabele vereinegings mins mèt ’t hart op de zjuste plaots. Heer heet zien kwaliteite ingezat en ziene vrije tied gegeve veur de gemeinsjap Lummel & Nazareth. Zoe waor heer de drievende krach achter ’t jaorlekse kraankebezeuk boemèt heer de nudege luikes ’n hart oonder de reem gestoke heet es heer same mèt “ziene” Prins bij de lui aon de deur koum. Binne us technische kemmissie heet heer same mèt zien kammeraode hiel väöl ore doorgebrach in de Hoeve. Eder jaor opnui de zaolversering en de vastelaovendswage gereid make of wat d’r ouch mer gemaak mós weure.
Jaore laank is heer secundant gewees en deech heer de Prins begeleije vaanaof tot heer woort oetgerope tot dat heer de Prinsesteek weer mós aofzètte. Hiel väöl Prinse zalle mèt ’n hiel good geveul dao aon trök dinke.
Wie gezach ‘ne vereinegingsmins in hart en nere.
Veer winse Thoosan, Debbie, Kevin, Remy, Wendy, Ivo, Daan, Evi en Noa hiel väöl sterkde um ’t groete verluus vaan Theo de koumende tied te kinne drage.
Veer goon Theo misse en zalle häöm noets vergete….!!
